JOMIVISI, Arthur Antunes Coimbra dît Zico

AMARCORD, JOMIVISI. Forsi al è parcè che îr sere o ài let un intervent tal sît de Gazete di un chal si vise de grandece di Zico, che vuê o ài fât câs al tapon di un tombin in Vie dai Rizzani chal puarte ancjemò l'iscrizion dal non di Zico.
A son pasâts vinchietrê agns de che spetaculâr Udin dal 1984, la scuadre dulà che e zuiave int come Mauro, De Agostini, Edinho, Virdis e Causio. Jo jeri piçul ma mi visi tant ben il stadi Friûl plen tant che un scus, cun int che vignive ancje dal Venit par viodi un dai plui fuarts zuiadûrs di balon di dopo mai, un che al prin an in Italie al rivà a butâ la bale in rêt par disenûf voltis.
La presince di un campion cetant grant in Friûl al è stât un fat unic e probabilmentri no ripetibîl, amancul parcè che campions cetant grancj no si viodin di un biel toc di timp cjalcâ i cjamps di balon. Se fôs par me gjavarès vie la statue di Bepi Garibalt de omonime place e indi metarès chê di Zico :)

Udin, Place San Jacum vuè e ae fin dal Votcent

Place San Jacum, di dopo mai lûc di mercjât, come che si viôt dal confront des fotografiis e à conservât ben il so aspiet originari. Mi visi di fats che cualchi an indaur a vevin dicidût di girâ propri in Place San Jacum un spot par une dite che e prodûs pastesute, parcè che la Place e une del miôr conservadis in Italie. Chel spot no lu si à mai viodût ae television parcè che è stât dât fûr dome in Australie.
Aspart l'aspiet estetic de place, ce che si note dal paragon des fotografiis al è il cambiament dal rapuart tra citât e campagne. In che volte di fat lis feminis a vignivin de campagne par vindi i prodots de lôr tiere, intant che in dì di vuê plui di cualchi barachin al è di proprietât di mercjadants vignûts de Cine a vindi peçots.

Udin, Place dal Polam vuê e ae fin dal Votcent

Cjalant il sît dal me amì Pauli Brisighelli o ài pensât di fâ cualchi fotografie ae Udin di vuê, juste par fà un paragon cun la Udin di une volte. E vè cà Place dal Polàm. La prime robe che mi salte al voli al è il traffic des machinis e dut ce chal comporte: stradis asfaltadis, semafars, segnaletiche stradâl.. Pal rest o noti segnai che mi fan intindi la cressite dal benstâ gjenerâl; un segnâl par esempli a son lis andis des personis.
Une altre robe che noti e è la presince di materiai sintetics, parsore di sore dut la plastiche des cjadreis che e presente il fuart contrast tra naturâl (moderni) e artificiâl (postmoderni).

Salvan, il diu pagan

Dant un cuc ale gnove enciclopedie de leterature taliane in edicole cun La Repubblica mi soi fermât a lei part dal Scongiuro aquinate, cuintri de morseade dal sarpint:

(Chel che al à) moccecatu lu christianu (al è il sarpint-demoni, al ven a stâi) lu fillu de diabulo nepote de Silvano

Cui isal, duncje, Silvano? Silvano, o Salvan, al jere une des divinitâts plui popolârs de tarde paganie rurâl, figurât par solit in compagnie di un cjan. Un diu pagan, duncje, chal devente demoni e chal rimande a la cristianizazion da lis campagnis.
Par viodi biei dissens di Salvans, Aganis e altris creaturis mitologjichis vi rimandi la sît di Sandri Di Sualt.