La Blogosfere furlane e cres

O ringrazi Dree par la segnalazion dal me blog insiemi cun chel di Sandri Carozzo, e chel di Luca Melchior, furlan in Baviere. Ben, la Blogosfere furlane si sta slargjant.

Notis di Paleantropologjie

Par comprendi la preistorie, ancje chê dal Friûl, a coventin des cognizions gjenerai su la origjin dal om e cussì o ài dicidût di meti dongje cualchi note cjapade su de enciclopedie storiche (chê de Mondadori) e dal web. Buine leture!

Te prime part dal Votcent la sience e tacà a indagâ parsore a lis origjinis dal om e tal 1859 Charles Darwin al publicà "Origjin de Specie", un tratât sientific chal displee la ingredeade schirie di vivents che la paleontologje e ere daur a discuvierzi di agns. Intant, tal 1856, intune valede dongje di Düsseldorf, clamade Neandertal, a forin discuvierzûts dai vues umans sensibilmentri diferents di chei dal om atuâl. Daspò dal om di Neandertal ca forin altris discuviertis dal gjenar che a dimostrarin la esistence di une forme umane europeane cun carateristichis scheletrichis primitivis e cussì e nassè la paleontologjie umane. Lis cognossincis mitudis adun dilunc circe cent e cincuante agns di studiis us consintin di afermâ che la forme umane atuâl e è il risultât di une storie evolutive che e scomençà plui di cinc milions di agns indaûr te Afriche orientâl.
L'om atuâl, chal à une culture estremamentri complesse, al è dut câs un primate chal si distache dal so parint plui prossim, il simpanzé, par mancul dal un parcent dal so patrimoni gjienetic. La paleoantropologjie, duncje, no pues fâ di mancul di confrontâ l'om cui i altris primatis e considerâ la posizion che la specie umane e ocupe jenfri chest ordin zoologic.
La classificazion tradizionâl cjape dentri lis tre grandis simiis antropomorfis - Gorile e Simpanzè africans e Orangutan asiatic - inte famee dai Pongjidis. Su la fonde di cheste considerazion l'om atuâl, Homo sapiens sapiens, al à di jessi classificât:

• Ordin: Primates
• Sotordin: Anthropoidea
• Superfamee: Hominoidea
• Famee: Hominidae
• Gjenar: Homo
• Specie: sapiens
• Sotspecie: sapiens

La famee Hominidea e cjape dentri l'om atuâl e dutis lis formis fossilis che a son in relazion filogjienetiche cun lui, fin a l'ultin antenât in comun cu lis simis antropomorfis. A fasin part, duncje, de famee Hominidae lis diferentis speciis dal gjenar Homo:

• Homo habilis
• Homo erectus
• Homo sapiens

e chês dal Australopithecus:

• Australopithecus ramidus
• Australopithecus afrensis
• Australopithecus africanus
• Australopithecus robustus
• Australopithecus boisei

Si pues duncje afermâ che Pongjidis africans e ominidis a derivin de diferenziaziôn di un grup preistoric di Hominidea.

Il Friûl te Preistorie: Il Paleolitic inferiôr

Il gjenar Homo al comparì su la tiere in Afriche (Sud Afriche, Kenya, Tanzanie, Etiopie) cirche doi milions e dusinte mil agns indaûr. La ete paleolitiche, o de piere sclesade, e scomencà cuant che l'om e tacà a lavorâ la piere cu lis mans, cirche un milion e sietcent e cuncuante mil agn indaûr.
Il plui antîcs reperts confermin la presince dal om in Europe intune epoche jenfri i tresinte e cincuante e i dusinte e cincuante mil agns indaûr; in che volte l'om al veve cjapât la posizion erete; al si nudrive di fueis, pomis e lidris; otignive i prins grês imprescj di piere; al praticave ancjmò il canibalisim e no soterave i muarts. Il lent alternasi de etis glaciâls (Pleistocene) e la grandiose opare di erosion dai glaçârs a an scancelât cuasi ogni olme de stazion dal om te nestre Regjon. Salacôr apartignin a chest periodi i rests cjatâts fûr te grote di Visoglian, dongje di Sistiane, chei cjatâts a Lozi no lontan di Postumie, in Slovenie, e si pense che à sedin di chest periodi ancje chei cjatâts tal landri dal Sandul, a sud di Pole.